Ｔ檔案室

東方日報
2010年01月29日(五)
北上全面體：男扮女裝玩偷拍

　　最近河南有個年輕人，竟然男扮女裝混入公眾女浴室沖涼，乘機偷拍裏面嘅「春光」，最後奸計未能得逞，因為有女客人見佢圍住毛巾，坐喺浴室將個袋摸嚟摸去，就係唔見佢沖涼，於是對佢特別留意，最後發現原來係男扮女裝嘅偷拍狂。

支持易服癖

　　事件傳開後，引起網友激烈討論，主要有三個論點，一就係講呢個河南青年係咪有易服癖嘅習慣，如果有呢種習慣，心理上都會認同自己係一個女生，咁佢去女浴室沖涼，係咪情有可原呢？討論結果竟然獲得大多數人嘅支持，以後女士們沖涼真係要小心啲。

　　第二個論點，就係對偷拍狂嘅行為大家支唔支持，呢方面比較正面，可能大家都唔希望私隱被侵犯，所以對偷拍嘅行為表示強烈譴責，期間更有唔少人講述自己畀人偷拍嘅遭遇，當中男女都有，睇嚟喜歡偷拍嘅人真係唔少，所以真係要認真對付。

偷拍為上網

　　第三個論點就討論青年偷拍嘅目的係乜？其實，不外乎兩種情況，一種係要嚟自娛，另一種係要嚟出售圖利。但網友表示，仲有第三種係既不為滿足自己欲望，亦不為金錢利益，呢種人一樣係偷拍狂，而且夠專業，拍到嘅相片，目的就係為咗放上網。

　　網友對第三種人嘅討論最激烈，可以話又愛又恨，因為佢哋比貪錢自娛更病態，存心為出賣別人而活，但好多網友嘅娛樂，亦係靠佢哋嘅貼圖嚟得到滿足，所以喺呢方面各方都爭持不下。至於呢個青年為乜要易服玩偷拍？咁真係要搵法官審過佢至可以清楚。

撰文：小德