東方
2010年05月01日(六)
日韓速報：男子女僕咖啡店最多OL幫襯
相信「女僕餐廳」對好多熟悉日本文化嘅朋友都唔會陌生，事關呢啲由年輕美女着住女僕衫做侍應嘅餐廳，喺日本可以話係成行成巿。但今日要介紹嘅，係一間由男子漢反串女僕嘅「男子女僕咖啡店」，係咪好特別呢！
請教扮靚心得
呢間「男子女僕咖啡店」開喺東京，現時有十名男侍應負責招待工作，一般女僕餐廳都係男仔去幫襯嘅居多，而呢間又會唔會一樣呢？原來完全相反，嚟呢間咖啡店嘅男客好少，反而吸引大量女客捧場。
網友介紹，原來呢班喜歡易服嘅女僕，雖然係男子漢，但個個都懂得打扮之道，而且有啲仲叻過女仔，好多年輕女顧客專登走嚟捧場，就係要請教佢哋打扮心得同埋買嘢小貼士，而佢哋亦會傾囊相授，所以深得女顧客嘅歡迎。此外，佢哋同其他女僕餐廳一樣，當每位客人進場，除咗會齊聲大叫：「歡迎女主人回來！」之外，招呼期間還會不斷「女主人」前、「女主人」後服侍客人！
易服愛好者
呢間男子女僕咖啡店，特別受OL歡迎，每逢放工之後，男同事就會去飲酒，而女同事就會嚟呢間咖啡店飲咖啡，呢度除咗氣氛舒適之外，眼見現場所有男仔都忍氣吞聲咁討好自己，整日受嘅氣都可以轉眼間煙消雲散，心情馬上變得開朗。
而呢啲「女僕」係咪個個都有易服癖嘅呢？原來全部都係易服愛好者，據講有啲變性人會走嚟搵工做，但遭店長拒絕。佢話：「我哋只請有易服癖嘅男仔，因為心理上覺得自己係女仔，平時都會以女性打扮，但佢哋可以公開易服嘅機會唔多，所以呢間店就正好提供一個舞台畀佢哋。」專為易服癖朋友而設嘅咖啡店，你有冇興趣嚟玩吓呀？
撰文：小德
Subscribe to:
Post Comments (Atom)
0 comments:
Post a Comment